2018年游戏界回顾（上）“雷声大雨点小？”
细佬上年曾经写过年度游戏界回顾，上年我用“续作多伏 Game ”、“老任强势回归、 Indie Games 抬头”同“多谢 EA ”嚟总结，今年简单啲，我用“雷声大雨点小？”嚟总结 2018 年慨游戏界。点解系雷声大雨点小？因为今年其实有唔少令人期待慨游戏，当然今年不乏好 game，但好多都令人失望，就算唔系令人失望都有一种“哦，系咁多咋？”慨感觉，等细佬抽啲重点嚟讲啦。
Monster Hunter：World
可能你会话“吓？MHW 都有份？”。系呀，当然佢唔系伏，一出嗰阵畀人抢购，炒到五百蚊只都有人买，最终喺 PlayStation Award 2018 破纪录攞到四白金亦都反映 MHW 喺销售上系好成功。但卖得好系咪就代表佢系一只冇得弹慨 game 呢？无疑佢系历史上画质最靓慨 MH ，但留意返计埋外传，前几集都系出喺 3DS ，今集出喺 PS4 画面真系好难会差过以前。虽然成个二月同三月真系差唔多人人都喺度玩 MHW ，但四月之后明显讨论度低咗好多，当然其中一个原因系好多人只系跟潮流买，根本冇考虑过只 game 啱唔啱自己玩。但唔少玩开慨 fans 都反映 MHW 好唔 MH ，除咗为打欧美市场而简化咗一啲比较复杂慨操作外，只 game 亦因将资源放哂落去提升画质，导致游戏内容唔及以前丰富。再讲一次，细佬唔系觉得 MHW 伏，只系似乎佢同大家慨期望有啲落差，又或者大家本身就畀咗个唔合理慨期望佢。不过而家同紧刺客信条合作、嚟紧又会同巫师合作， 19 年秋季仲会推出等同以往 G 级慨 DLC Ice Borne ，相信会引到唔少人回锅。
真三国无双 8
《 Fallout 76 》未推出之前佢根本就系 2018 伏 game 之最，出之前标榜新系统、开放世界真系令唔少 fans 兴奋。不过出到嚟居然喺旧 PS4 / PS4 Slim 大跌 frame rate ，就算 Pro 机冇呢个问题，大家都发现地图系就系大咗，但剧情并冇随之变得丰富，最后沦为“真．跑步无双 8 ”。题外话，成件事最搞笑系，唔用新系统居然成为咗 9 月推出慨《无双 OROCHI 蛇魔 3 》慨卖点之一⋯⋯
星之卡比 新星同盟
戴返个头盔先，我系知《星之卡比》系主打细路仔市场慨，但都真系有啲失望。算系元老级慨卡比积落慨 fans 一定唔会少，作为新机第一只卡比真系引到唔少人狗冲，虽然细佬唔系集集卡比都玩齐，但呢集真系我玩过游戏性最低慨一集。而家最令大家觉得伏慨系佢个价同其他 3A 大作睇齐，就以美国定价 US$59.99 嚟讲， US$59.99 你可买到 Zelda 、 Mario Odyssey 、 FIFA、 Pokémon 、大乱斗等等，求其一只慨游戏性都远超《星之卡比 新星同盟》，但佢哋同价⋯⋯如果佢卖平返 US$20 ，我谂大家就唔会觉得佢伏。
The Quiet Man
近年开始有唔少混合真人影集慨游戏推出，有啲都几受欢迎，可能因为可以当睇戏，自己又有得参与下。呢只 game 标榜玩家玩嗰阵可以感受到自己系一个听障人士，而且动作指导系《人中之龙》慨滨田修一郎，期待度当然高。可惜个所谓感受到自己系一个听障人士只系等同你打机唔开声，但最难令人理解慨系喺冇声冇字幕慨情况下，点解主角会明对方讲紧乜知要做乜⋯⋯就算爆机之后慨 New Game Plus 会加返哂啲声落去，但似乎大家都唔太受落。不过公平啲讲，原价都只系 HK$99 ，本来真系唔应该有咩期望，只系佢啲预告吹得太大，先搞到大家玩落同期望有好大落差。
Fallout 76
年度伏作！相信都唔使细佬点解释，但最伏慨竟然唔系只 game ，只 game 伏都仲可以用新 content 补救，最伏系买你个限定版，实体特典帆布袋变尼龙袋，要去到有律师行话可以帮玩家提告先跪低，但好死唔死之后个 server 无啦啦出事，搞到登记攞返帆布袋慨玩家资料可以任人睇，你话 2019 最伏仲唔系佢！？
当然，今年都有唔少好 game 慨，炒冷饭但实际唔多人玩过慨《 Bayonetta 》、暗黑版 Sim City 慨《 Frostpunk 》、攞奖攞到手软慨《 God of War 》、延续 Marvel 热潮慨《 Marvel’s Spider-man 》、令人有深切反思慨《 Detroit: Become Human 》、记忆系统超强慨《 Red Dead Redemption 2 》同两只 Indie Game 《 Celeste 》同《 Dead Cells 》。而最令细佬婉惜慨就系《 Labo 》，其实个设计意念系几好，可惜佢都系打破唔到大家觉得只系用几旧水买纸皮慨印象，特别喺香港咁潮湿的确系几难保存，不过喺欧美地区《 Labo 》系几受欢迎，之后应该继续有新 Labo 慨玩意推出。
