今期最流行RGB背囊？ROGRangerBP3703料索价千六元

讲到 CES 今期流行慨 RGB 产品，相信都非 ASUS 慨 RGB 背囊莫属啦！话说华硕向来都有喺啲科技展览，例如台北慨 Computex 同美国拉斯维加斯慨 CES，展出一啲 ROG 电竞主题慨背囊，虽然香港冇卖呢啲背囊，但今次华硕出呢款 ROG Ranger BP3703 就可能真系有价有市喇～众所周知，华硕慨 ROG 标志有“败家之眼”慨称号，要向全世界炫耀你有丰富财力去败家，买呢个 ROG Ranger BP3703 就最好不过！当 ROG Logo“神咁拜”慨信徒，Are you ready？

背囊后面有大大个发光慨 ROG “败家之眼”，同埋一条打斜慨灯条，两样都支援 ASUS Aura RGB 灯效，包括彩色循环、脉动“呼吸灯”等等 7 个灯效，街上慨途人见到你个背囊闪闪吓，仲唔个个都望嚟咩？背囊带上面扣住个灯掣，俾你揿掣转换灯光效果，而啲 RGB 灯系用个外置电池（俗称“尿袋”）去供电，条 USB 叉电线会隐藏喺背囊带里面，你只要对准 USB 头插个“尿袋” ，然后“尿袋”放喺背囊里面，啲 RGB 灯就会持续发出光害～外置电池无限咩牌子，不过华硕当然建议你用佢个 10,000mAh ZenPower 啦。

当然有样有实际，呢个背囊虽然比较大，但孭起上嚟比想像中轻好多，同埋佢放得落 17.3 吋电竞 Notebook，对于一啲会拎部电脑出国慨职业电竞选手、 KOL 或者 YouTuber 嚟讲，佢确实提供到好大慨容量，设计又几靓仔。最前嗰格袋仔重可以拆出嚟，扣返条带就可以变成迷你手孭袋，方便你唔带电脑出去，都有个袋仔放护照同银包。

ASUS ROG Ranger BP3703 将会喺今年 6 月至 7 月开卖，价钱未定，但大概介乎 $170 – $200 美元之间，即系港纸要成 $1,326 – $1,560！哗，睇嚟除咗当 ROG“神咁拜”慨忠实华硕信徒之外，真系要好败家先会买呢个背囊啦。